“Maqsadimiz - xalq hayotini yaxshilash”: Saida Mirziyoyevadan ilk katta intervyu

Shaxsan o‘zi esa xalqaro diplomatiya va muloqotdan katta zavq olishi, maqsad xalq hayotini yaxshilash ekani, "har bir inson muhim" degan qarashni takrorladi. Mirziyoyeva administratsiya rahbari etib tayinlanishini prezidentga joylardagi real holat haqida to‘g‘ridan to‘g‘ri axborot yetkazish zarurati bilan bog‘ladi.

Prezident administratsiyasi rahbari Saida Mirziyoyeva ilk katta intervyusida o‘z faoliyati, davlat rahbarining ish uslubi hamda administratsiya oldida turgan ustuvor vazifalar haqida ochiq gapirdi. Uning ta’kidlashicha, prezident administratsiyasi asosan strategik yo‘nalishlarni ishlab chiqadi va ijro apparatiga aniq yo‘nalish beradi. Mirziyoyeva bugungi davrni “islohotlar davri” deb atab, tizimdagi o‘zgarishlar uzluksiz nazorat va katta mas’uliyat talab qilishini aytdi.

Intervyuda Saida Mirziyoyeva prezident Shavkat Mirziyoyevning shaxsiy sifatlari va rahbarlik uslubiga to‘xtalib, uni insonni tinglaydigan, hurmat qiladigan va jamoani “o‘stira oladigan” rahbar sifatida ta’rifladi. Mirziyoyevaning so‘zlariga ko‘ra, davlat rahbari jamoaga ishonish, fikr almashish va kadrlarni rivojlantirishga katta e’tibor beradi. U islohotlar “faqat qattiqqo‘llik” bilan emas, balki moslashuvchanlik va donolik orqali amalga oshishini qayd etdi.

Saida Mirziyoyeva Prezident administratsiyasi oldidagi besh ustuvor yo‘nalishni sanab o‘tdi: suv, ta’lim, tibbiyot, biznes va sud-huquq tizimi. Uning ta’kidlashicha, ayniqsa suv masalasi kelajakdagi eng katta chaqiriqlardan biri bo‘lib, agrar mamlakat uchun bu yo‘nalish strategik ahamiyatga ega. Ta’lim va tibbiyotdagi o‘zgarishlar esa “uzoq muddatli” jarayon bo‘lib, natijani bir kunda ko‘rish qiyinligini aytdi.

Mirziyoyeva sud-huquq tizimi mavzusiga alohida urg‘u berib, shaffof va adolatli sud tizimisiz boshqa sohalardagi islohotlar to‘liq ishlamasligini bildirdi. Uning fikricha, biznes muhitini yaxshilash, investitsiya va ishonchni oshirish, fuqarolar huquqini himoya qilish kabi masalalar oxir-oqibat qonun ustuvorligiga bog‘liq.

Shaxsiy nuqtai nazardan, Saida Mirziyoyeva xalqaro diplomatiya va muloqotni o‘zining eng yoqadigan yo‘nalishi sifatida ta’kidladi. U odamlar bilan muloqot qilish, aloqalar o‘rnatish va hamkorlikni kuchaytirishdan zavq olishini aytdi. “Maqsad — xalq hayotini yaxshilash”, deya takrorlagan Mirziyoyeva, davlat boshqaruvida “har bir inson muhim” degan qarashni asosiy tamoyil sifatida ko‘rsatdi.

Intervyuda u Prezident administratsiyasi rahbari etib tayinlanish sabablariga ham ishora qildi. Mirziyoyevaning aytishicha, prezidentga joylardagi real holatni to‘g‘ridan to‘g‘ri yetkazib beradigan mexanizm kerak — ya’ni haqiqiy vaziyatni ko‘radigan, uni yashirmasdan ma’lum qiladigan va berilgan topshiriqlarning ijrosini nazorat qiladigan “ko‘z va qo‘llar” zarur. U tayinlovni aynan shu ehtiyoj — islohotlar ijrosini joylarda kuchaytirish va haqiqiy manzarani rahbariyatga yetkazish bilan bog‘ladi.