Abdulaziz Komilov Tinchlik kengashiga qo‘shilish sabablarini izohladi

Komilov “O‘zbekiston 24” telekanaliga bergan intervyusida Tinchlik kengashi tashabbusini qo‘llab-quvvatlashga uchta asosiy omil ta’sir qilganini aytgan: birinchidan — xavfsizlik jihatidan milliy manfaatlar, ikkinchidan — Kengashning maqsad va vazifalari tashqi siyosat prinsiplariga mosligi, uchinchidan — Yaqin Sharqda hayotiy muhim manfaatlar borligi.

Uning so‘zlariga ko‘ra, tashabbus kun tartibidagi asosiy yo‘nalishlardan biri — G‘azo sektoridagi harbiy-iqtisodiy inqirozni bartaraf etish va uni tartibga solish bo‘lib, Tinchlik kengashini tuzish tashabbusi AQSh prezidenti Donald Tramp tomonidan ilgari surilgan.

Maslahatchi “jiddiy muhim manfaatlar”ni mintaqaviy, global va milliy xavfsizlik bilan bog‘lab, O‘zbekistonning Yaqin Sharqqa e’tibori ekstremizm xavflari tufayli ham oshirilishini qayd etgan. U ayrim fuqarolarning ekstremistik guruhlarga qo‘shilib, keyin mamlakatga qaytgan holatlari bo‘lganini, davlat esa ularning qaytishi va jamiyatga qayta moslashuvi uchun sharoit yaratganini aytgan.

Komilov bu yondashuv xalqaro darajada e’tirof etilganini bildirib, BMT rahbariyati O‘zbekistonning gumanistik siyosatini yuqori baholaganini qayd etgan.

Shuningdek, intervyuda Yaqin Sharqdagi vaziyatning Afg‘oniston xavfsizligiga ta’siri ham tilga olingan. Komilovga ko‘ra, muammoni hal etish uchun xalqaro hamjamiyat — AQSh, arab va musulmon davlatlari bilan birga Markaziy Osiyo mamlakatlari ham birgalikda harakat qilishi zarur.

U O‘zbekistonning sammitda ishtiroki siyosiy va ramziy jihatdan muhim ekanini, bu mamlakatga bo‘lgan ishonch va uning xalqaro maydondagi nufuzini ifoda etishini ta’kidlagan.

Ma’lumot o‘rnida: 22 yanvar kuni prezident Shavkat Mirziyoyev Davosdagi Jahon iqtisodiy forumi doirasida AQSh prezidenti Donald Tramp bilan Tinchlik kengashi bo‘yicha kelishuvni imzolagan, marosimda Yaqin Sharq, Janubiy Amerika, shuningdek Yevropa va Janubiy Kavkaz davlatlari vakillari ishtirok etgan.