Yerto‘ladagi bayram va uysiz qolgan bolalar. Urush suratlari

13 aprel kuni Ukraina armiyasi «Moskva» raketa kreyseri (Qora dengiz floti flagmani)ga zarba berilganini ma’lum qildi. RF mudofaa vazirligi Kiyevdagi «qaror qilish markazlari»ga hujum qilish bilan tahdid soldi. Rossiya armiyasi Mariupol qamalini davom ettirmoqda. Ukraina xavfsizlik xizmati «Putinning kumi» Viktor Medvedchuk qo‘lga olinishi tafsilotlarini ochiqladi — unga ko‘ra davlatga xiyonatda ayblanayotgan siyosatchining qochishga urinishini Rossiya maxsus xizmatlari tashkillashtirgan.

12 yoshli Danik Rak va uning buvisi Nina Vinnik Chernigovda Rossiya armiyasi zarbalari chog‘ida vayron bo‘lgan uy o‘rnida. Zarbalardan keyin Danikning onasining oyog‘ini kesib tashlashgan, u hamon shifoxonada qolmoqda
AP Photo/Evgeniy Maloletka

Ukrainadagi urush. So‘nggi ma’lumotlar:

RF mudofaa vazirligi rossiyaliklarning «Moskva» raketa kreyserida yong‘in boshlangani va o‘q-dorilar portlagani, uning ekipaji evakuatsiya qilingani haqida xabar berdi. Bungacha Ukraina tomoni ushbu kreyserga qanotli raketalar bilan zarba berilganini ma’lum qilgandi. «Moskva» - RF harbiy-dengiz kuchlarining Qora dengiz flotidagi flagmani hisoblanadi;
Avstraliya Rossiya kompaniyalariga, jumladan «Gazprom» va Rossiya temiryo‘llariga qarshi sanksiyalar kiritdi;
Rossiya Mariupolda mingdan ortiq ukrain harbiylari taslim bo‘lganini xabar qildi. Ukraina tomoni bu ma’lumotni tasdiqlamagan va shahar uchun janglar davom etayotganini bildirgan.
Chorshanba kuni Buchaga Haagadagi Xalqaro jinoyat sudi prokurori Karim Xon keldi. U butun Ukraina jinoyat joyiga aylanganini aytdi. Avvalroq YeXHT ham Rossiya tomonidan harbiy jinoyatlar sodir etilgani ehtimolini ma’lum qilgandi;
AQSh Ukrainaga yana 800 mln dollarlik qurollar yetkazib beradi, jumladan kamikadze-dronlari, vertolyotlar, gaubitsalar va zirhli transportlar.