Ертўладаги байрам ва уйсиз қолган болалар. Уруш суратлари

13 апрел куни Украина армияси «Москва» ракета крейсери (Қора денгиз флоти флагмани)га зарба берилганини маълум қилди. РФ мудофаа вазирлиги Киевдаги «қарор қилиш марказлари»га ҳужум қилиш билан таҳдид солди. Россия армияси Мариупол қамалини давом эттирмоқда. Украина хавфсизлик хизмати «Путиннинг куми» Виктор Медведчук қўлга олиниши тафсилотларини очиқлади — унга кўра давлатга хиёнатда айбланаётган сиёсатчининг қочишга уринишини Россия махсус хизматлари ташкиллаштирган.

12 ёшли Даник Рак ва унинг бувиси Нина Винник Черниговда Россия армияси зарбалари чоғида вайрон бўлган уй ўрнида. Зарбалардан кейин Даникнинг онасининг оёғини кесиб ташлашган, у ҳамон шифохонада қолмоқда
AP Photo/Evgeniy Maloletka

Украинадаги уруш. Сўнгги маълумотлар:

РФ мудофаа вазирлиги россияликларнинг «Москва» ракета крейсерида ёнғин бошлангани ва ўқ-дорилар портлагани, унинг экипажи эвакуация қилингани ҳақида хабар берди. Бунгача Украина томони ушбу крейсерга қанотли ракеталар билан зарба берилганини маълум қилганди. «Москва» - РФ ҳарбий-денгиз кучларининг Қора денгиз флотидаги флагмани ҳисобланади;
Австралия Россия компанияларига, жумладан «Газпром» ва Россия темирйўлларига қарши санкциялар киритди;
Россия Мариуполда мингдан ортиқ украин ҳарбийлари таслим бўлганини хабар қилди. Украина томони бу маълумотни тасдиқламаган ва шаҳар учун жанглар давом этаётганини билдирган.
Чоршанба куни Бучага Ҳаагадаги Халқаро жиноят суди прокурори Карим Хон келди. У бутун Украина жиноят жойига айланганини айтди. Аввалроқ ЕХҲТ ҳам Россия томонидан ҳарбий жиноятлар содир этилгани эҳтимолини маълум қилганди;
АҚШ Украинага яна 800 млн долларлик қуроллар етказиб беради, жумладан камикадзе-дронлари, вертолётлар, гаубицалар ва зирҳли транспортлар.