Burama mixlar qanday ishlab chiqariladi - Mexmash zavodiga sayohat

Qurilish-ta'mirlash ishlarini burama mixlar, ya'ni shurup va samorezlarsiz tasavvur qilib bo‘lmaydi. Ular qanday ishlab chiqarilishi haqida hech o‘ylab ko‘rganmisiz? Mexmash zavodi bu qiziqarli jarayonni boshidan oxirigacha ichidan ko‘rsatib berishni va'da qilgach, Namanganga yo‘l oldik.

Namangan shahrida joylashgan “Mexmash” MChJ yuqori sifatli shurup va samorezlar ishlab chiqarish bilan shug‘ullanib, nafaqat O‘zbekiston bozorini, balki yaqin xorij bozorlarini ham o‘z mahsulotlari bilan ta'minlab kelmoqda.

Korxonaning ta'minot bo‘yicha direktor o‘rinbosari Adhamjon Ahadovga ko‘ra, hozirgi kunda Mexmash zavodida oyiga 1700 tonna mahsulot ishlab chiqarilib, shuning 10 foizi, ya'ni 170 tonnasi eksportga yo‘naltiriladi.

“Maqsadimiz – 3-kvartaldan boshlab eksport hajmini 20 foizga olib chiqish”, – deydi Ahadov.

Mahsulot sifati korxona uchun asosiy tamoyil bo‘lib, buning uchun kompaniya Yevropa DIN standartiga muvofiq ishlab chiqilgan tashkilot standarti hamda ISO 9001:2015 sifat menejmenti tizimi asosida to‘liq sifat nazoratini yo‘lga qo‘ygan.

Mahsulotlar umumiy sifat parametrlarini tekshirilishidan tashqari, qo‘llanish o‘rniga qarab amaliy sinovlardan ham o‘tkaziladi. Bundan maqsad – iste'molchilar uchun albatta sifatli mahsulot yetib borishini kafolatlashdir.

Ho‘sh, o‘rama mixlar qanday ishlab chiqariladi, ularning mustahkamligi va korroziyaga chidamliligi qanday ta'minlanadi – ko‘rsatuvimiz orqali bilib oling.