Ronaldo Xitoyda 30ta futbol maktabi ochadi

Braziliyalik sobiq futbolchi Ronaldo Xitoyda 30ta futbol maktabi ochishni rejalashtirmoqda. Bu haqda uning o‘zi Sinxua nashriga bergan intervyusida aytib o‘tgan.

"Bu yerda futbol u qadar rivojlanmagan bo‘lsada, ammo ulkan imkoniyatlar bor. Xitoyda futbol maktabi ochishimdan maqsad shuki - bu yerda futbolchilar va muxlislarni yanada ko‘paytirmoqchiman.
Xitoyda futbol juda keng tarqalgan, ammo hozirga qadar uni rivojlantirish bo‘yicha birorta aniq reja amalga oshirilmagan", - deydi Ronaldo.
U yosh futbolchilarni tarbiyalash orqali soha rivojiga hamda kerakli natijalarga erishishga umid bildirgan.
"O‘ylaymanki, Xitoy hukumati bu ishda meni qo‘llab-quvvatlaydi", deydi u.

Qayd etish kerakki, futbol hozirgi kunda xitoylik tadbirkorlar tomonidan jiddiy e'tibor qaratilayotgan sohaga aylanib bormoqda. Statistik ma'lumotlarga ko‘ra, 2014-15 yillar mavsumida ichki chempionatdagi jamoalar futbolchilarning transferlari uchun 121,5 mln dollar sarflagan. Bu ko‘rsatkich bo‘yicha Xitoy Superligasi faqatgina APLdan ortda qolgan.

2016-2020 yillar mobaynida o‘tkaziladigan 5 mavsumdagi Superliga o‘yinlari translyatsiyasi huquqi 8 mlrd yuan (1,26 mlrd dollar) evaziga sotilgan.

Sohaga qaratilayotgan e'tibor ulkan ko‘lamda bo‘lsada, xalqaro maydonlarda natijalarga erishilmagan. Xitoy milliy terma jamoasi faqatgina bir marta, 2002 yilda JCh ishtirokchisi bo‘lgan.