Роналдо Хитойда 30та футбол мактаби очади

Бразилиялик собиқ футболчи Роналдо Хитойда 30та футбол мактаби очишни режалаштирмоқда. Бу ҳақда унинг ўзи Синьхуа нашрига берган интервьюсида айтиб ўтган.

"Бу ерда футбол у қадар ривожланмаган бўлсада, аммо улкан имкониятлар бор. Хитойда футбол мактаби очишимдан мақсад шуки - бу ерда футболчилар ва мухлисларни янада кўпайтирмоқчиман.
Хитойда футбол жуда кенг тарқалган, аммо ҳозирга қадар уни ривожлантириш бўйича бирорта аниқ режа амалга оширилмаган", - дейди Роналдо.
У ёш футболчиларни тарбиялаш орқали соҳа ривожига ҳамда керакли натижаларга эришишга умид билдирган.
"Ўйлайманки, Хитой ҳукумати бу ишда мени қўллаб-қувватлайди", дейди у.

Қайд этиш керакки, футбол ҳозирги кунда хитойлик тадбиркорлар томонидан жиддий эътибор қаратилаётган соҳага айланиб бормоқда. Статистик маълумотларга кўра, 2014-15 йиллар мавсумида ички чемпионатдаги жамоалар футболчиларнинг трансферлари учун 121,5 млн доллар сарфлаган. Бу кўрсаткич бўйича Хитой Суперлигаси фақатгина АПЛдан ортда қолган.

2016-2020 йиллар мобайнида ўтказиладиган 5 мавсумдаги Суперлига ўйинлари трансляцияси ҳуқуқи 8 млрд юань (1,26 млрд доллар) эвазига сотилган.

Соҳага қаратилаётган эътибор улкан кўламда бўлсада, халқаро майдонларда натижаларга эришилмаган. Хитой миллий терма жамоаси фақатгина бир марта, 2002 йилда ЖЧ иштирокчиси бўлган.