Fransiya harbiy kemasi Yaponiyaga yetib keldi

Fransiya harbiy-dengiz kuchlarining "Mistral" turidagi vertolyot tashuvchi-desantchi kemasi 29 aprelda Kyusyu orolidagi Sasebo shahrida joylashgan yapon harbiy-dengiz bazasi bandargohiga kirib keldi. Bu haqda Yaponiya harbiylariga iqtibos keltirgan holda xorijiy OAV xabar bermoqda.  

Kema Fransiya, Yaponiya, AQSh va Buyuk Britaniya ishtirokidagi harbiy-dengiz mashg‘ulotlarida ishtirok etadi.   

Yaponiya harbiylarining ma'lum qilishicha, o‘tajak mashg‘ulotlar "unda ishtirok etayotgan davlatlar o‘rtasida hamkorlik va ishonchni kuchaytirish va chuqurlashtirish uchun tashkillashtirilmoqda".  

Mashg‘ulotlar 3-22 may kunlari Yaponiya atrofida hamda Shimoliy Mariana orollari va Guam orollari yaqinida o‘tishi kutilmoqda. Manyovrlarda 700 harbiy, jumladan 220 nafar yapon harbiysi va 60 nafar britan dengizchisi ishtirok etishi rejalashtirilgan. Mashg‘ulotlarga shuningdek yana bir fransuz kemasi – "Lafayyet" turidagi fregat qo‘shilishi kerak.

OAVning ta'kidlashicha, mashg‘ulotlar Koreya yarimorolidagi taranglikning oshishi ortida o‘tkazilmoqchi. Avvalroq AQShning "Karl Vinson" atom aviatashuvchi kemasi boshchiligidagi kemalar guruhi va Janubiy Koreya harbiy-dengiz kuchlari Yapon dengizida birgalikdagi mashg‘ulotlarni boshlashgani ma'lum qilingandi.