Rossiya «Tolibon» bilan bog‘liq ayblovga javob qaytardi

Rossiya Tashqi ishlar vazirligining rasmiy vakili Mariya Zaxarova AQSh Davlat departamentining Rossiya «Tolibon» harakatiga qurol-yarog‘ yetkazib berayotgani haqidagi bayonotiga izoh berdi. Bu haqda RIA «Novosti» xabar qilmoqda.

«AQSh Davlat departamenti rahbarining 22 avgust kungi Amerikaning Afg‘oniston bo‘yicha yangi strategiyasiga bag‘ishlangan brifingda qilgan bayonoti tushunarsiz. Xususan, u Rossiyani toliblarga qurol-yarog‘ yetkazib berishda aybladi», - dedi u.

Zaxarovaning ta'kidlashicha, Rossiya bu boradagi ayblovlarni bir necha marta rad etgan.

«Navbatdagi marotaba ma'lum qilamizki, toliblarga hech qanday qo‘llab-quvvatlov ko‘rsatmayapmiz», - dedi Zaxarova.

Uning ta'kidlashicha, bunday bayonotlar mamlakatlar o‘rtasida afg‘on yo‘nalishida hamkorlikni yo‘lga qo‘yishga yordam bermaydi. 

Avvalroq AQSh davlat kotibi Reks Tillerson Rossiyani toliblarga qurol yetkazib berishda ayblagandi.