Mirziyoyev Meksika prezidentiga hamdardlik bildirdi

O‘zbekiston Respublikasi Prezidenti Shavkat Mirziyoyev Meksika Qo‘shma Shtatlari Prezidenti Enrike Penya Netoga maktub yo‘lladi. 

Mazkur maktubda “Meksika janubidagi talofatli zilzila oqibatida ko‘plab insonlarning halok bo‘lishi va jarohatlanishi haqidagi xabar bizni chuqur qayg‘uga soldi” deyilgan.

Davlat rahbari butun Meksika xalqiga, nobud bo‘lganlarning oila a'zolari va yaqinlariga samimiy hamdardlik va dalda so‘zlarini yetkazishni so‘radi, shuningdek, barcha jarohat olganlarga tez fursatlarda sog‘ayishni tiladi.

Avvalroq Meksikada yuz bergan kuchli zilzila oqibatida halok bo‘lganlar soni 95 kishiga yetgani xabar qilingandi.