Qozog‘istonda dahshatli avariya. Avtomobil yonib ketishi oqibatida 6 nafar o‘zbekistonlik halok bo‘ldi

Bugun, 1 mart kuni soat 6:00da Qozog‘istonning Mang‘istov viloyatida yirik yo‘l-transport hodisasi ro‘y berishi oqibatida 7 kishi halok bo‘ldi. Bu haqda TengriNews xabar tarqatdi.

Shetpe qishlog‘i yaqinida, «Oqtov – Beynov» avtoyo‘lidagi dahshatli YTH Lada Largus (davlat raqami 90 S830JA) yengil mashinasi va Shacman (davlat raqami 737 DPA/12) yuk mashinasi ishtirokida ro‘y bergan. Halok bo‘lganlarning 6 nafari O‘zbekiston fuqarolaridir.

Bu ma'lumot O‘zbekiston Favqulodda vaziyatlar vazirligi tomonidan tasdiqlandi.

To‘qnashuvdan keyin avtomobil yonib ketgan.

Ayni vaqtda qurbonlarning shaxsini aniqlash ishlari boshlangan, halokat yuzasidan tergov ishlari olib borilmoqda.

FVV maxsus telefon raqami ochdi: (+998 71) 147-10-50.

O‘zbekistonning Qozog‘istondagi diplomatik vakolatxonasi telefon raqamlari: +7 777 218-20-10 va +7 727 291-06-44.