Yo‘lovchi bojxona deklaratsiyasini to‘ldirish yo‘riqnomasiga o‘zgartirish kiritildi

O‘zbekiston Respublikasi Davlat bojxona qo‘mitasining qarori bilan Yo‘lovchi bojxona deklaratsiyasini to‘ldirish va rasmiylashtirish tartibi to‘g‘risidagi yo‘riqnomaning 2-bandiga o‘zgartirish kiritildi.

O‘zbekiston Respublikasi Bojxona kodeksi, O‘zbekiston Respublikasi «Davlat bojxona xizmati to‘g‘risida»gi Qonunining 6-moddasi, O‘zbekiston Respublikasi Prezidentining 2018 yil 6 fevraldagi PQ-3512-son «Jismoniy shaxslar tomonidan bojxona chegarasi orqali tovarlarni olib o‘tilishini yanada tartibga solish chora-tadbirlari to‘g‘risida»gi qaroriga muvofiq O‘zbekiston Respublikasi Davlat bojxona qo‘mitasi qaror qildi:

1. O‘zbekiston Respublikasi Davlat bojxona qo‘mitasining 2014 yil 4 iyuldagi 01-02/12-13-son qarori (ro‘yxat raqami 2606, 2014 yil 5 avgust) (O‘zbekiston Respublikasi qonun hujjatlari to‘plami, 2014 y., 32-son, 411-modda) bilan tasdiqlangan Yo‘lovchi bojxona deklaratsiyasini to‘ldirish va rasmiylashtirish tartibi to‘g‘risidagi yo‘riqnomaning 2-bandi quyidagi tahrirda bayon etiladi:

«2. Deklaratsiya:

jismoniy shaxslar tomonidan tovarlarni olib kirishning bojxona to‘lovlari undirilmaydigan cheklangan me'yorlaridan oshadigan tovarlarga;

jismoniy shaxsning yashash joyi o‘zgarganda (avvalgi yashash joyidan hisobdan chiqarilganligi to‘g‘risida qayd mavjud bo‘lgan holda) uning shaxsiy mol-mulki bo‘lgan tovarlarga, bundan avtotransport vositalari mustasno;

O‘zbekiston Respublikasi Bojxona kodeksining 158 va 160-moddalarida ko‘rsatilgan hollarda, jismoniy shaxslarning notijorat maqsadlardagi transport vositalariga;

qonun hujjatlariga muvofiq yozma deklaratsiyalanishi lozim bo‘lgan naqd ko‘rinishdagi O‘zbekiston Respublikasining milliy valyutasi va valyuta boyliklariga;

jismoniy shaxslar tomonidan respublika hududidan tovarlarni olib chiqishning cheklangan me'yoridan oshadigan tovarlarga;

qonun hujjatlariga muvofiq tegishli taqiqlar va (yoki) cheklovlar belgilangan tovarlarga to‘ldiriladi.».

2. Mazkur qaror Davlat statistika qo‘mitasi bilan kelishilgan.

3. Mazkur qaror rasmiy e'lon qilingan kundan e'tiboran kuchga kiradi.