Rossiyada internet orqali xarid hajmi 1 trln rubldan oshib ketdi

Rossiyada internet-savdo bozori 2017 yilda 13 foizga oshib, 1,04 trln rublni tashkil qildi. Bu haqda Internet-savdo kompaniyalari uyushmasida (AKIT) ma'lum qilingan. Biroq bu natija uyushmaning umidlarini oqlay olmadi, u bozor 25 foizga o‘sib, 1,15 trln rublni tashkil qilishini kutgandi.

“Biz kattaroq natija kutgandik. O‘sish 2 marta sekinlashgan”, deb aytgan AKIT prezidenti Aleksey Fyodorov. U o‘sish sekinlashganini 2017 yilda rossiyaliklarning xarid qilish qobiliyati 9 foizga kamaygani bilan tushuntirgan. 

Uyushma 2018 yilda internet-savdo bozori hajmi 1,25 trln rublga yetishini kutmoqda.

2017 yilda rossiyaliklar xorijiy internet-do‘konlarda 374,3 mlrd rubl sarflashgan, bu esa 2016 yilga nisbatan 24 foiz ko‘proq bo‘lgan. Xorijiy do‘konlarga rossiyaliklarning barcha onlayn-xaridlarining 36 foizi to‘g‘ri kelgan.

Xorijiy xaridlarning 91 foizi Xitoyga to‘g‘ri kelgan. Bu borada Yevropa Ittifoqi ulushi 3 foizni, AQShniki 2 foizni tashkil qilgan.  

Rossiyaliklarning xorijiy internet-do‘konlardagi aksariyat xaridlari qiymati boj to‘lanmaydigan summa – 22 yevrodan oshmaydi. Bunday xaridlarga tranzaksiyalarning 61,4 foizi, 22 yevrodan 55 yevrogacha buyurtmalarga 22,2 foizi, 50 yevrodan 150 yevrogacha xaridlarga 11,6 foizi to‘g‘ri kelgan.

Ayni vaqtda dunyodagi eng yirik elektron savdo bozori Xitoy hisoblanadi. 2017 yilda Xitoyning internet-savdo bozori 32 foizga oshib, 1,15 trln dollardan ko‘proqni tashkil qilgan. Bu borada 2-o‘rin AQShga tegishli, 2017 yilda uning internet-savdo bozori hajmi 455 mlrd dollarni tashkil qilgan.