G7 sammitining yangi mavzulari ma'lum qilindi

Fransiya prezidenti Emmanuel Makron AQSh yetakchisi Donald Tramp bilan uchrashuv yakunlari bo‘yicha ma'lum qildiki, G7 («Katta yettilik») davlatlarining shanba, 9 iyun kuni bo‘lib o‘tadigan sammitida Shimoliy Koreya, Eron hamda Suriya bilan aloqador bo‘lgan masalalar muhokama qilinadi. Fransiyalik yetakchining so‘zlari Oq uy saytida keltirilgan.

«Bugun kechqurun bizda Shimoliy Koreya bo‘yicha guruh munozaralari bo‘lib o‘tadi - sizda Singapurda bu masala bo‘yicha juda muhim uchrashuv o‘tkaziladi, - shuningdek, Suriya va Eron masalasi tilga olinadi», - deya aytib o‘tdi Makron Trampga.

Bundan tashqari, uning ta'kidlashicha, AQSh yetakchisi bilan munozara «juda ochiq va to‘g‘ridan-to‘g‘ri» shaklda bo‘lib o‘tgan. Makronning ta'kidlashicha, savdo masalalaridagi «favqulodda» qarama-qarshiliklarga qaramay, har ikki tomon ham «mag‘lubiyatsiz yondashuv»ni topish niyatida.

Eslatib o‘tamiz, avvalroq Rossiyaning AQSh va KXDR sammitiga ta'sir ko‘rsatishi mumkinligi aytilgandi.