Ekologik nazoratning jamoatchi inspektorligiga nomzod maxsus tayyorgarlikdan o‘tadi

Ekologik nazoratning jamoatchi inspektorligiga nomzodlarni maxsus tayyorgarlikdan o‘tkazish tartibi to‘g‘risidagi nizom Adliya vazirligida davlat ro‘yxatidan o‘tkazildi.

“Huquqiy axborot” kanalining xabar berishicha, nizomga muvofiq nomzodlar ekologik nazoratning jamoatchi inspektori bo‘lish uchun maxsus tayyorgarlikdan o‘tishlari lozim bo‘lib, fuqarolar ekologik nazoratning jamoatchi inspektori bo‘lish uchun maxsus tayyorgarlik kurslariga bepul qabul qilinadi 

Buning uchun yashash joyidagi fuqarolar yig‘inlarining ekologiya komissiyasiga yoki ekologiya sohasida faoliyat yurituvchi nodavlat notijorat tashkilotiga ariza bilan murojaat qilishi lozim.

Nomzod ma'qullangan taqdirda Atrof muhitni muhofaza qilish sohasidagi xodimlarni qayta tayyorlash va ularning malakasini oshirish markaziga nomzodni maxsus tayyorgarlik kurslariga yuborish to‘g‘risida rasmiy xat kiritiladi.

Maxsus tayyorgarlik kurslaridan muvaffaqiyatli o‘tgan nomzodlarga ekologik nazoratning jamoatchi inspektori guvohnomasi berilishiga asos bo‘ladigan sertifikat beriladi.