«Borussiya» «Barselona» futbolchisi transferi bo‘yicha kelishuvga erishdi

«Barselona» hujumchisi Pako Alkaser faoliyatini Dortmundning «Borussiya» klubida davom ettiradi. 

Kicker manbasi ma'lumotiga ko‘ra, katalonlar klubi ushbu 24 yoshli futbolchisini keyinroq sotib olish huquqi bilan bir yil muddatga 2 million yevro evaziga ijaraga berishga rozi bo‘lgan. Nemislar jamoasi mavsum yakunlangach, futbolchini 26 million yevroga transfer qilishi mumkin.

Alkaserning o‘zi faoliyatini Germaniyada davom ettirishni istagan, bu jamoa safida u doimiy ravishda Chempionlar ligasi o‘yinlarida ishtirok etishi mumkin.

Bundan avvalroq futbolchiga «Betis», «Alaves» va «Portu» klublaridan qiziqishlar mavjudligi haqida xabarlar berilgandi.

Pako Alkaser - «Valensiya» klubi tarbiyalanuvchisi hisoblanadi. U bu jamoa safida barcha turnirlar doirasida 124 o‘yin o‘tkazgan va 43 gol urgan. U 2016 yil yozida «Barselona»ga o‘tgandi. U katalonlar jamoasi bilan bir marta Ispaniya chempionatida g‘olib chiqdi va ikki marta mamlakat kubogini qo‘lga kiritdi.

Kataloniya jamoasi safida jami 50 o‘yinda maydonga tushgan Alkaser 15 gol urgan. U Ispaniya chempionati doirasida 14 o‘yin o‘tkazgan, shundan faqat ikki martasida boshlang‘ich tarkibda harakat qilgan.

Hujumchi Ispaniya terma jamoasida 2014 yilda debyut qilgan. U milliy terma jamoa uchun jami 13 o‘yinda maydonga tushib, 6 gol urgan. 2016 yilgi Yevropa chempionati saralashida u 5 golga mualliflik qilib, eng yaxshi to‘purar bo‘lgandi, ammo u turnirga olib ketilmadi.