Samolyotda birinchi marta uchgan yo‘lovchi noqulay ahvolga tushdi

Samolyotda umrida birinchi marta uchgan hindistonlik parvoz vaqtida favqulodda eshikni hojatxona eshigi deb o‘ylab ochmoqchi bo‘ldi. Bu haqda The Express Tribune nashri xabar berdi. 

Voqea Nyu-Dehlidan Patna shahriga parvoz amalga oshirayotgan GoAir aviakompaniyasi samolyotida yuz bergan. Parvoz vaqtida erkak samolyot eshigini torta boshlagan. Boshqa yo‘lovchi undan nima qilayotganini so‘raganda, u hojatxonaga kirmoqchiligini aytib, eshikni ochishga urinishini davom ettirgan. Shunda boshqa yo‘lovchi bortkuzatuvchilarni chaqirgan va ular erkakni to‘xtatishgan. 

Samolyot qo‘ngandan keyin aviakompaniya xodimlari erkakni keyingi tergov uchun tegishli idoralar qo‘liga topshirgan. Aviakompaniya xodimining ta'kidlashicha, ushbu voqea boshqa yo‘lovchilarga xavf solmagan, chunki samolyot eshigini parvoz vaqtida ochib bo‘lmaydi.