Boeing dunyodagi eng katta va qudratli ikki dvigatelli yuk samolyotini taqdim etdi

Amerikaning Boeing korporatsiyasi muhim ishlab chiqarish bosqichini qayd etdi: yangi 777-8F yuk samolyotining birinchi nusxasi Everettdagi angardan olib chiqildi.

Boeing o‘tgan yilning yozida 777-8F samolyotini qurishni boshlagan edi.

Samolyotni yig‘ish tugagandan so‘ng, amerikalik muhandislarning asosiy e’tibori birinchi parvozga tayyorgarlik ko‘rishga qaratiladi. Bu bosqich juda muhim hisoblanadi: aynan u parvoz sinovlari boshlanishidan oldin barcha tizimlar to‘g‘ri ishlayotganiga ishonch hosil qilish imkonini beradi.

777-8F modeli keyingi avlodning eng yangi yuk samolyoti bo‘lib, u parvoz masofasi va tejamkorligi bo‘yicha o‘zidan oldingilardan ustun bo‘lishi kutilmoqda.

Uning paydo bo‘lishi Boeing 777X oilasi dasturida yangi bosqichni belgilaydi, uning rivojlanishi sertifikatlash, sinovlar va yetkazib berish kechikishlari bilan birga kelgan.

Yangi samolyot juda katta o‘lchamlarga ega - uzunligi taxminan 70,9 m va qanotlari kengligi 71,8 m gacha, bu uni o‘z sinfidagi eng kattasiga aylantiradi.

Boeing GE9X dvigatellari, kompozit qanotlar va noyob yig‘iladigan qanot uchlari bilan jihozlanadi. Zamonaviy texnologiyalar qisman 787 Drimlaynerdan olingan.

Samolyot bortida 45 ga yaqin palletni joylashtirish mumkin, ulardan 31 tasi asosiy palubada va yana 13 tasi pastki palubada.

777-8F ning umumiy foydali yuk ko‘tarish qobiliyati 118 tonnani, parvoz masofasi esa taxminan 8160 kilometrni tashkil etadi. Shunday qilib, samolyotning maksimal yuk ko‘tarish qobiliyatini to‘rt dvigatelli Boeing 747-400F bilan taqqoslash mumkin.

Avvalgi modellarga nisbatan yuk ko‘tarish qobiliyati va masofasining oshishi aviakompaniyalarga kamroq texnik qo‘nishlar bilan ko‘proq uzoq masofali reyslarni amalga oshirish imkonini beradi.