Ugandadagi avtohalokatda 14 kishi hayotdan ko‘z yumdi

13 yanvarda Ugandaning Pakvach okrugida sodir bo‘lgan yo‘l-transport hodisasida 14 kishi halok bo‘ldi va bir necha kishi jarohat oldi. Bu haqda New Vision nashri ma'lum qildi. 

Guvohlarning aytishicha, 30 ga yaqin odamni olib ketayotgan yuk mashinasi boshqaruvi yo‘qotilib, yo‘ldan chiqib ketib, bir necha marta ag‘darilgan.

Mahalliy politsiya vakili Jozefin Angusia avtohalokatda 14 kishi halok bo‘lganini, ulardan ko‘pchiligi ayollar ekanini tasdiqlagan.

Uning aytishicha, qurbonlar soni oshishi mumkin,  chunki jarohatlanganlar shifoxonada og‘ir ahvolda qolmoqda.