Merkelning samolyotiga avtomobil urildi

13 may kuni Germaniyaning Dortmund shahri aeroportida kansler Angela Merkel uchib kelgan Bombardier Global 5000 samolyotiga avtomobil kelib urildi. Bu haqda Deutsche Welle nashri xabar berdi. 

Ichida haydovchi bo‘lmagan Renault Trafic avtomobili turargohda turgan samolyotga urilgan. Voqea oqibatida hech kim jabrlanmagan. To‘qnashuv vaqtida Merkelning o‘zi samolyotda bo‘lmagan. Samolyot ekipaji a'zolariga ham putur yetmagan.

Bundesver texniklari samolyotni ta'mirlashni boshlab yuborishgan. Avtomobil o‘z-o‘zidan harakatga kelganining sababi o‘rnatilmoqda.

Nashrning bundesverdagi manbalariga iqtibos keltirgan holda ma'lum qilishicha, haydovchi mashinani qo‘l tormoziga qo‘ymagan bo‘lgan.   

Ta'kidlanishicha, kansler Berlinga hukumat samolyotlaridan birida qaytgan.