Turkiyadagi yo‘l-transport hodisasida 15 qochqin halok bo‘ldi  

Turkiya sharqidagi Van viloyatida yuz bergan yo‘l-transport hodisasi oqibatida 43 qochqin jabr ko‘rdi. Turk OAV xabar berishicha, dastlabki ma'lumotlarga ko‘ra, 15 kishi halok bo‘lgan, 28 kishi yaralangan.  

Ma'lum qilinishicha, voqea 18 iyul kunduzi O‘zalp tumanida  yuz bergan. Haydovchi egri-bugri yo‘lda noqonuniy muhojirlar tashilgan mikroavtobusni boshqarolmay qolgan. Oqibatda transport vositasi trassadan chiqib ketib, ag‘darilib ketgan.

Voqea joyiga ko‘p sonlik o‘t o‘chiruvchilar, jandarmeriya va 20 ta tez yordam mashinasi yetib kelgan. Barcha jarohatlanganlar yaqin oradagi davlat shifoxonalariga yetkazilgan.

Haydovchi ushlanib, politsiya bo‘limiga shaxsini o‘rnatish va ko‘rsatmalar berish uchun yetkazilgan. Jandarmeriya tergov boshlab yuborgan.

Van viloyati Eron chegarasida joylashgan. Bu yerdan Turkiyaga afg‘onistonlik migrantlar oqimi keladi.