Aqto‘beda ichida 53 nafar o‘zbekistonlik bo‘lgan avtobus buzilib qoldi

12 yanvar kuni Aqto‘be viloyatida 53 nafar O‘zbekiston fuqarolari bo‘lgan Samara—Chimkent yo‘nalishi bo‘ylab harakatlanayotgan «Setra» rusumli avtobusi texnik nosozlik tufayli to‘xtab qoldi. O‘zbekistonning Aqtau shahridagi (Qozog‘iston) bosh konsulxonasi ushbu ma'lumotni tasdiqlagan. 

Hodisa Aqto‘be oblastining Xromtau tumani Don qishlog‘i yaqinida yuz bergan. Voqea joyiga Xromtau tumani Favqulodda vaziyatlar xizmati xodimlari yetib kelgan va yo‘lovchilarga «Amanat» lageriga evakuatsiya qilishni taklif qilgan, lekin ular buni rad etishgan.

Shundan so‘ng avtobus ta'mirlash ishlari tugaguncha yo‘lovchilar kutib turishlari uchun hodisa joyiga isitilgan avtobus yuborishga qaror qilingan.

Tashqi ishlar vazirligi xabarida aytilishicha, 13 yanvar kuni mahalliy vaqt bilan soat 11:00da avtobus ta'mirlash ishlari yakunlangach, marshrut bo‘yicha harakatlanishda davom etdi.

Bosh konsulxona, shuningdek,13 yanvar kuni Aqto‘be – Orenburg trassasida yo‘l-transport hodisasi yuz bergani, natijada voqea joyida haydovchi, O‘zbekiston fuqarosi E.M. halok bo‘lgani, yana bir o‘zbekistonlik I.K. turli jarohatlar bilan kasalxonaga yotqizilgani haqida ham xabar berdi.

Bosh konsulxona vaziyatni nazoratga olgan va Qozog‘istonning tegishli organlari bilan doimiy aloqada bo‘lib turibdi.

TIV Konsullik-huquqiy departamenti marhumning oila a'zolari va yaqinlariga hamdardlik izhor etgan hamda yana bir bor O‘zbekiston fuqarolari e'tiborini avtobuslarda yoki avtomobil transportining boshqa turlarida qish mavsumida Qozog‘istonga kirishda yoki uning hududidan o‘tishda ehtimoliy xatarlarni hisobga olish va tegishli choralar ko‘rish zarurligiga qaratgan.

Qozog‘iston hududida bo‘lib turgan O‘zbekiston fuqarolari, jumladan tranzit bilan boshqa davlatga o‘tayotgan yurtdoshlar, zarur hollarda mamlakatning Nur-Sulton shahridagi elchixonasiga (Nur-Sulton shahri, Aqmo‘la, Shimoliy Qozog‘iston, Pavlodar, Qo‘stanay va Qarag‘anda viloyatlari, tel.: +7-717-295-45-87, +7-777-218-20-10 (Telegram, Whatsapp, Imo); Aqtau shahridagi bosh konsulxonaga (Aqto‘be, Atirau, G‘arbiy Qozog‘iston va Mangistau viloyatlari, tel.: +7-29-277-71-17, +7-777-599-00-50, +7-777-599-00-51); Olmaota shahridagi bosh konsulxonaga (Olmaota shahri, Chimkent shahri, Olmaota viloyati, Sharqiy Qozog‘iston, Turkiston, Jambil va Qizilo‘rda viloyatlari, tel.: +7-727-299-20-70, +7-727-390-26-16) murojaat qilishlari mumkinligini eslatib o‘tilgan.