Qozog‘istonda senatga deputatlar saylovi bo‘lib o‘tadi

12 avgustda Qozog‘istonda parlamentning yuqori palatasi – Senatning vakolatlari tugayotgan 17 a'zosi o‘rnini egallaydigan a'zolari saylovi bo‘lib o‘tadi. Senatdagi 17 o‘ringa 46 nomzod da'vogarlik qilmoqda. Saylovlarda mahalliy hokimiyat vakillik organlari deputatlari qatnashadi.

Foto: Abzal Kaliyev

Qozog‘iston senatida umumiy hisobda 49 o‘rin bor bo‘lib, ularga mamlakatning 17 ta hududidan 2 nafardan deputat saylanadi. Shuningdek, 15 deputat senatda milliy-madaniy turfa xillikni ta'minlash maqsadida prezident tomonidan tayinlanadi. Senatorlar vakolatlari muddati 6 yilni tashkil qiladi. Ulardan yarmi har 3 yilda qayta saylanadi.

2020 yil 15 oktyabrda senatning hududlardan saylangan 17 a'zosi vakolatlari tugaydi va shu sabab navbatdagi saylovni o‘tkazish zarurati yuzaga kelgan. Saylov natijalari markaziy saylov komissiyasi tomonidan 7 kun ichida e'lon qilinadi.

Senatorlikka Sharqiy Qozog‘iston oblastidan 4 nomzod, Oqmola, Atirau, G‘arbiy Qozog‘iston, Qarag‘anda, Qo‘stanay, Qizilo‘rda va Pavlodar oblastlaridan, Nur-Sulton, Olmaota va Chimkent shaharlaridan 3 nafardan nomzod, qolgan hududlardan esa 2 nafardan nomzod da'vogarlik qilmoqda.

Avvalgi shunday saylovlar respublikada 2017 yil 28 iyunida bo‘lib o‘tgan. O‘shanda 16 deputat saylangan, chunki Chimkentga republika ahamiyatiga molik shahar maqomi bir yildan keyin berilgan.