Toshkentda yuz bergan YTH oqibatida 17 yoshli yigit vafot etdi

Yunusobod tumanida ro‘y bergan yo‘l-transport hodisasi haqida ma'lumot berildi. Toshkent shahar IIBB tegishli xabarni e'lon qildi.

Ma'lum qilinishicha, 2021 yil 26 iyul kuni taxminan soat 18:30da Yunusobod tumani Yangi Yunusobod ko‘chasida 1993 yilda tug‘ilgan S.X. “Nexia-2” avtomobilini boshqarish davomida yo‘lni kesib o‘tayotgan piyodani urib yuborgan.

Yo‘l-transport hodisasi oqibatida piyoda, 2004 yilda tug‘ilgan A.T. badan shikastlari bilan shifoxonaga yetkazilgan, ammo tibbiyot xodimlarining sa'y-harakatlariga qaramasdan, hayotdan ko‘z yumgan.

Mazkur fakt bo‘yicha Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi bo‘yicha jinoyat ishi qo‘zg‘atildi. Tergov olib borilmoqda.