O‘zbekistonda Renault avtomobillari narxlari e'lon qilindi

Renault Uzbekistan saytida fransuz avtokonserni mahsulotlarining O‘zbekiston bozori uchun narxlari e'lon qilindi.

Rasmiy manbada uch xil avtomobil uchun quyidagi narxlar ko‘rsatilgan:

• Kaptur – 221 115 600 so‘mdan boshlab;
• Duster – 225 108 500 so‘mdan boshlab;
• Arkana – 230 879 300 so‘mdan boshlab.

Mazkur narxlar QQSni o‘z ichiga olgan-olmagani hozircha ma'lum emas. Komplektatsiyalar bo‘yicha to‘liq prays-list hali e'lon qilinmadi.

Kompaniya O‘zbekiston bozoriga kirishi haqida o‘tgan hafta bergan e'lonida ilk krossoverlar shu yil kuzidanoq sotuvga chiqarilishini ma'lum qilgandi.

Dastlabki bosqichda avtomobillar Toshkentdagi ikkita dilerlik markazida sotiladi.

Fransiya kompaniyasi, shuningdek, O‘zbekistondagi Roodell bilan birgalikda mamlakatda avtomobil ishlab chiqarishni yo‘lga qo‘yishni ham rejalashtirmoqda.

Bundan oldin “Avtovaz” prezidenti Nikolya Mor O‘zbekistonda Lada va Renault avtomobillarini yig‘ish rejalashtirilayotgani haqida aytib o‘tgandi.