Toshkentda sovuq suv uchun «aqlli» hisoblagichlarni o‘rnatish boshlandi

«O‘zsuvta’minot» AJ va Janubiy Koreya davlatining K-Water korporatsiyasi o‘rtasida imzolangan memorandumga asosan Toshkent shahrining Mirobod tumani Qo‘yliq-1 mavzesida 610 ta «aqlli» suv hisoblagichlarini o‘rnatish hamda billing tizimiga ulanishi belgilangan edi.

Ma’lum qilinishicha, hozirgi kunda 18 ta ko‘p qavatli uylarda jami 500 ta «aqlli» suv hisoblagichlari o‘rnatildi.

Yangi hisoblagichlarning ishi kompyuter tizimi tomonidan boshqariladi. Bu ma’lumotlarni baholash, to‘plash va qayta ishlash bosqichida inson omilini minimallashtiradi. 

Avvallari xodimlarning uyma-uy yurib, hisoblagich ko‘rsatkichlarini tekshirishga sarflagan vaqti endi suv ta’minoti tarmoqlarining texnik holatini yaxshilashga yo‘naltiriladi.