O‘zbekistonda arzon ijtimoiy uy-joy qurish bo‘yicha Turkiya tajribasi qo‘llanadi

O‘zbekiston bosh vaziri o‘rinbosari – investitsiyalar va tashqi savdo vaziri Jamshid Xo‘jayev Turkiya Davlat uy-joy boshqarmasi (TOKI) rahbari Omer Bulut bilan uchrashdi.

Foto: Dunyo

Uchrashuvda O‘zbekiston tomoni Turkiya aholisi uchun arzon ijtimoiy uy-joylar qurish bo‘yicha TOKI faoliyatini yuqori baholadi hamda ilg‘or turk texnologiyalari va tajribasidan foydalangan holda uy-joy qurilishi sohasida hamkorlikni yo‘lga qo‘yishga qiziqish bildirdi.

Omer Bulut O‘zbekistonda amalga oshirilayotgan islohotlar, investorlar uchun yaratilgan shart-sharoitlarni ta’kidlar ekan, qo‘shma istiqbolli loyihalarni hayotga tatbiq etish, texnik va maslahat yordami ko‘rsatish, keyingi 5 yil uchun «Ijtimoiy uylar yaratish strategiyasi»ni ishlab chiqishga ko‘maklashish doirasida o‘zaro hamkorlikni davom ettirishga tayyor ekanini bildirdi.

Muloqot yakunlari bo‘yicha tomonlar arzon ijtimoiy uy-joylar qurish bo‘yicha Turkiya tajribasidan foydalangan holda kelgusi hamkorlik tashkiliy jihatlarini ishlab chiqish bo‘yicha qo‘shma ishchi guruh tuzishga kelishdi.