Qashqadaryodagi tug‘uruqxonada ona va bola vafot etdi

Ayolning turmush o‘rtog‘i farzandi va xotinining o‘limida shifokorlarni ayblamoqda.

Qashqadaryo viloyati Koson tumanidagi tug‘uruqxonada ona va chaqaloq vafot etgan. Bu haqda ijtimoiy tarmoqlarda marhumaning eri tomonidan chiqarilgan videoda aytilgan.

Beshqo‘ton mahallasida yashovchi erkakning aytishicha, u xotinini tug‘uruq jarayoni yaqinlashgani sababli shifoxonaga olib borgan. O‘sha kuni kechga borib vrachlar unga chaqaloq va onaning vafot etgani haqida aytishgan.

Ayol 1991 yilda tug‘ilgan bo‘lib, uchta farzandi bo‘lgan. Ayol to‘rtinchi farzandini tug‘ish uchun tug‘uruqxonaga borgan. Hozirda erkak xotini va bolasining o‘limida shifokorlarni ayblamoqda.

Qashqadaryo viloyat prokuraturasi matbuot kotibi hodisa yuzasidan ma’lumot berdi. Unda aytilishicha, ayolning ahvoli og‘irlashib, vafot etgani holati yuzasidan hozirda tuman prokuraturasi tomonidan qo‘shimcha tergovga qadar tekshiruv harakatlari olib borilmoqda.

Holat yuzasidan tegishli ekspertiza tayinlangan. Tekshiruvning borishi alohida nazoratga olingan.

Avvalroq, 2022 yil avgust oyida Shahrisabzdagi tug‘uruqxonada bir haftada uchta chaqaloq vafot etgandi.