Slovakiya O‘zbekistondan mehnat migrantlarini jalb qilishni rejalashtiryapti

Slovakiya sanoat va transport uyushmalari federatsiyasi vakillari mamlakatda yangi ishlab chiqarish quvvatlari tashkil etilayotgani hamda mahsulot eksportiga talab oshayotgani tufayli qo‘shimcha ishchi kuchiga bo‘lgan ehtiyoj ham ko‘payib borayotganini, O‘zbekistondan mehnat migrantlarini jalb qilish bo‘yicha o‘zaro hamkorlikni yo‘lga qo‘yishdan Slovakiya tomoni manfaatdor ekanini ma’lum qilishdi.

Muzokaralarda Slovakiya sanoati uchun mamlakatdan jalb etiladigan ishchilarni o‘qitish va malakasini oshirish bo‘yicha qo‘shma kurslar tashkil etish masalasini ishlab chiqishga kelishib olindi.

Agentlik tomonidan fuqarolarni Slovakiyaga ishga yuborish uchun ish beruvchilardan so‘raladigan hujjatlar namunalari va tuziladigan shartnomalar loyihalarini yuborishga, Slovakiya tomoni esa ushbu hujjatlarni federatsiya a’zolariga tarqatish va salohiyatli ish beruvchilarni aniqlash, shuningdek, ehtiyojdan kelib chiqqan holda agentlik orqali O‘zbekistondan zarur ishchi kuchini jalb etishga kelishib olindi.