Yevropa sudi Rossiyaning Nemsovning o‘ldirilishi bo‘yicha tergovini samarasiz deb topdi

Rossiya muxolifatchi Boris Nemsovning o‘ldirilishi bo‘yicha samarali tergov olib bormadi. Shu munosabat bilan, Inson huquqlari bo‘yicha Yevropa konvensiyasining 2-moddasi («Yashash huquqi») buzilgan, Rossiya davlati jabrlanuvchi sifatida tan olingan siyosatchining qizi Janna Nemsovaga 20 ming yevro miqdorida tovon to‘lashi kerak. Bunday qaror 11 iyul, seshanba kuni Strasburgdagi Inson huquqlari bo‘yicha Yevropa sudi (IHeS) tomonidan qabul qilindi. 

Sudga ko‘ra, tergovchilar qotillikning ehtimoliy siyosiy sababi haqidagi versiyaga yetarlicha e’tibor bermagan. «Sud, xususan, Rossiya rasmiylari suiqasdni kim uyushtirgani va buyurtma qilganini yetarlicha tergov qilmaganini, suiqasdning ehtimoliy siyosiy motivi va unga ayrim davlat amaldorlarining aloqadorligi; janob Nemsovning o‘ldirilishi uchun mukofot taklif qilingan bo‘lishi mumkin bo‘lganlarning maqsadi haqidagi da’volarni o‘rganmaganini aniqladi», deyiladi sudning veb-saytida e’lon qilingan qarorga asosda. 

«Janob Nemsovning o‘ldirilishi siyosiy sabablarga ko‘ra sodir etilgan bo‘lishi mumkinligi, shuningdek, ayrim davlat amaldorlarining voqealarga aloqador bo‘lishi mumkinligi haqidagi iddaolar aql bovar qilmaydigan narsa emas, - deya bildirdi sud. - Janob Nemsov taniqli siyosatchi, Rossiyadagi muxolifat yetakchilaridan biri edi va u raqiblari, jumladan, Chechenistonning yuqori martabali vakillari haqida juda tanqidiy gaplar gapirgan». 

Bir necha yillar davomida Boris Nemsovning advokati bo‘lgan va hozir Olga Mixaylova bilan birga Janna Nemsovaning manfaatlarini IHeSda himoya qilayotgan huquq himoyachisi Vadim Proxorovning so‘zlariga ko‘ra, sudning Rossiyada muxolif siyosatchining o‘ldirilishiga oid tergov bo‘yicha qarori «fundamental xususiyatga ega» va «mutlaqo ramziy ahamiyatga ega». «Bu haqiqatan ham Yevropa sudi himoya dalillarini qabul qilganidan dalolatdir», - dedi u DW nashriga bergan intervyusida.