Rossiya KXDRga harbiy yordam uchun 600 000 tonna guruch taklif qilmoqda

Shimoliy Koreya moliyaviy va oziq-ovqat inqirozini asosan Pxenyanning Ukrainadagi urushga Rossiya Federatsiyasi tomonida qo‘shgan hissasi uchun Rossiyadan ma’lum bir «kompensatsiya» evaziga hal qildi. Bu haqda Janubiy Koreyaning The Korea Herald gazetasi 3 noyabr, yakshanba kuni Koreya Respublikasining Rossiyadagi sobiq elchisi Vi Son Lakka tayanib xabar berdi.

Shunday qilib, Rossiya KXDRga 600 ming tonnadan 700 ming tonnagacha guruch taklif qilmoqda, deya tushuntirdi bir necha kun avval parlament razvedka qo‘mitasida bo‘lib o‘tgan brifingda Janubiy Koreya Milliy razvedka xizmati (NIS) ma’lumotlari bilan tanishgan Vi Son Lak. Ilgari Moskva Pxenyanga vaqt-vaqti bilan 50-100 ming tonna guruch jo‘natgan, deydi sobiq diplomat.

Xitoy Rossiya va KXDR o‘rtasidagi «munosabatlar»ni «ularning shaxsiy ishi» deb atadi

Xitoy Rossiya va Shimoliy Koreya o‘rtasidagi tobora mustahkamlanib borayotgan munosabatlarni o‘z ishi deb hisoblamaydi. «Rossiya va KXDR ikki mustaqil va suveren davlatdir va ikki tomonlama munosabatlarni rivojlantirish faqat shu ikki davlatning ishi», — dedi Xitoy Xalq Respublikasi Tashqi ishlar vazirligi matbuot kotibi Lin Jiang 1 noyabr kuni Pekindagi brifingda.

Lin Jiang, shuningdek, «Xitoy Moskva va Pxenyan o‘rtasidagi ikki tomonlama almashinuv va hamkorlikdagi o‘ziga xos vaziyatdan xabardor emasligini» qo‘shimcha qildi. Pekin hali ham «tomonlar vaziyatni yumshatishga intilib, Ukraina inqirozi (Rossiyaning Ukrainaga qarshi urushi)ga siyosiy yechim yo‘lida harakat qiladi, deb umid qilmoqda», deya xabar berdi u.