O‘zbekiston prezidenti Shavkat Mirziyoyevning Tojikiston prezidenti Imomali Rahmon bilan o‘zaro kelishuviga asosan mamlakat hukumati delegatsiyasi joriy yilning 21 iyul kuni Tojikistonga tashrif buyurdi.
Dushanbe shahrida Tojikiston prezidenti Imomali Rahmon O‘zbekiston bosh vaziri Abdulla Aripov boshchiligidagi mamlakat hukumati delegatsiyasini qabul qildi.
Suhbat avvalida O‘zbekiston bosh vaziri Tojikiston prezidenti Imomali Rahmonga davlat rahbari Shavkat Mirziyoyevning salomi va ezgu tilaklarini yetkazdi.
O‘zbekiston bosh vaziri mamlakatda bo‘lib o‘tgan saylovdan so‘ng Shavkat Mirziyoyevni dastlabki daqiqalarda prezident Imomali Rahmon tabriklaganini bildirib, bu qardosh Tojikiston davlati mamlakatda olib borilayotgan islohotlarni qat’iy qo‘llab-quvvatlayotganidan dalolat ekanini qayd etdi.
Uchrashuvda oliy darajada erishilgan kelishuvlar ijrosini ta’minlash, O‘zbekiston bilan Tojikiston o‘rtasidagi ko‘p qirrali munosabatlarni, eng avvalo, savdo-iqtisodiyot, investitsiyalar, energetika, qishloq xo‘jaligi va boshqa ustuvor sohalarda amaliy hamkorlikni yanada kengaytirishga alohida e’tibor qaratish kerakligi ta’kidlandi.
