Kolomoyskiy 250 million dollarni o‘zlashtirganlikda ayblanyapti

Ukraina Milliy aksilkorrupsiya byurosi (UMAB) tadbirkor Igor Kolomoyskiy «Privatbank»ning 9,2 milliard grivna (taxminan 249 million dollar) miqdoridagi mablag‘ini «talon-toroj qilish»da gumonlanayotganini ma’lum qildi, deb xabar berdi idora matbuot xizmati 7 sentabr, payshanba kuni. 

Tergov ma’lumotlariga ko‘ra, 2015 yil boshida Kolomoyskiy «nazorat ostidagi offshor kompaniyani yanada moliyalashtirish va bank ustav kapitalidagi o‘z ulushini oshirish» maqsadida «Privatbank» mablag‘larini «qo‘lga kiritish rejasini ishlab chiqqan». Buning uchun bankka sun’iy ravishda Kolomoyskiy nazorati ostidagi kompaniyaga «o‘z obligatsiyalarini oshirib yuborilgan qiymatda qayta sotib olish bahonasi bilan» 9,2 milliard grivnadan ko‘proq pul to‘lash majburiyati yuklangan.

Keyinchalik bu summaning bir qismi (446 mln grivnadan ortiq) qimmatli qog‘ozlarni oldi-sotdisi bo‘yicha bitimlar niqobi ostida bir-biriga bog‘liq bo‘lgan uchta kompaniyaning hisobraqamlariga, so‘ngra yana ikkita yuridik shaxsning hisobraqamlariga o‘tkazilgan. Oxir-oqibat, pul Kolomoyskiyning shaxsiy hisobraqamiga tushgan va u ularni Ukraina Milliy banki talablariga muvofiq «Privatbank»ning ustav kapitaliga kiritgan, deb xabar berdi UMAB matbuot xizmati. 

Kolomoyskiyning ehtimoliy sheriklari 

Kolomoyskiy bilan birgalikda bu ishda bank rahbarlaridan yana besh kishi ishtirok etmoqda. Ular o‘zgalar mulkini o‘zlashtirish, jinoiy yo‘l bilan olingan mol-mulkni qonuniylashtirish, hujjatlarni qalbakilashtirishda ayblanmoqda. 

Sentyabr oyi boshida Ukraina sudi Kolomoyskiyni 509 million grivna miqdorida garov to‘lash imkoniyati bilan hibsga oldi. O‘shanda Ukraina xavfsizlik xizmati («SBU») tadbirkor firibgarlik va jinoiy yo‘l bilan qo‘lga kiritilgan mulkni qonuniylashtirishda gumon qilinayotgani haqida xabar berdi. Tergov ma’lumotlariga ko‘ra, 2013 yildan 2020 yilgacha Kolomoyskiy nazorat ostidagi bank tuzilmalari orqali xorijga yarim milliard grivnadan (taxminan 14 million dollar) o‘tkazgan.