AQSh Ukrainaga yordam uchun ajratilgan mablag‘ning 96 foizini sarflab bo‘ldi

AQSh hukumati Kongress tomonidan Ukrainaga yordam berish uchun ma’qullangan deyarli barcha mablag‘larni sarflab bo‘ldi, dedi Oq uy Milliy xavfsizlik kengashining strategik aloqalar bo‘yicha koordinatori Jon Kirbi. «Urush boshidan beri Ukrainaga ajratilgan mablag‘larning umumiy miqdoridan - bu 60 milliard dollardan oshadi, va gap nafaqat xavfsizlik, balki iqtisodiy, moliyaviy va gumanitar yordam haqida ham boryapti - biz 96 foizga yaqinini sarflab bo‘ldik», dedi Kirbi 8 noyabr, chorshanba kuni Oq uydagi brifingda.

Agar faqat harbiy yordam haqida gapirilsa, uning so‘zlariga ko‘ra, ajratilgan mablag‘ning 90 foizdan ortig‘i sarflangan. «Mudofaa vazirligida qish uchun zaxiralarni to‘ldirishga taxminan 1,1 milliard dollar qoldi», deya qo‘shimcha qildi Kirbi. U yana bir bor AQSh prezidenti Jo Baydenning Ukrainaga qo‘shimcha yordam haqidagi so‘rovini ma’qullash zarurligini ta’kidladi.

Bayden Kongressdan Ukraina uchun yana 61,4 mlrd dollar talab qilmoqda

Oktyabr oyida Bayden AQSh Kongressiga Ukrainaga bir yil muddatga 61,4 milliard dollar miqdorida moliyaviy yordam, shuningdek, Isroil mudofaasini mustahkamlash uchun 14,3 milliard dollar hamda qo‘shimcha mablag‘ sifatida 31 milliard dollar, jumladan, Falastin aholisiga yordam berish uchun 10 milliard dollar, AQSh-Meksika chegarasini himoya qilish uchun 13,6 milliard va boshqa milliy xavfsizlik ustuvorliklari uchun 7,4 milliard ajratish so‘rovini yuborgan edi. AQSh prezidenti Kongressdan so‘ragan mablag‘ning umumiy miqdori 106,7 milliard dollarni tashkil etdi. 

AQSh Senati 7 noyabr kuni Isroilga Falastinning HAMAS tashkilotiga qarshi kurashida Ukrainaga bir vaqtning o‘zida ko‘mak ko‘rsatmasdan yordam berish uchun 14,3 milliard dollar ajratish haqidagi qonun loyihasini blokladi. 2 noyabr kuni u respublikachilar ko‘pchilik bo‘lgan Vakillar palatasi tomonidan ma’qullangan, biroq demokratlar ustunlikka ega bo‘lgan AQSh Kongressining yuqori palatasida ovoz berishdan o‘ta olmadi.