Isroilning yangi gumanitar pauzaga tayyorligi va G‘azo sektoriga yordam yetkazilishi HAMAS garovga olganlarni ozod qilishga hissa qo‘shishi mumkin, dedi mamlakat prezidenti.
Isroil HAMAS harakati bilan janglarda yangi gumanitar pauzaga va G‘azo sektoriga qo‘shimcha insonparvarlik yordami yetkazib berishga tayyor. Bu haqda Isroil prezidenti Itsxak Gersog 19 dekabr, seshanba kuni 80 mamlakat elchilari va diplomatlari oldida ma’lum qildi. Davlat rahbarining so‘zlariga ko‘ra, bunday choralar 7 oktyabr kuni HAMAS jangchilari tomonidan asirga olingan garovdagilarni ozod qilishga yordam berishi mumkin.
«Mossad» Isroil razvedka xizmati rahbari David Barnea, AQSh Markaziy razvedka boshqarmasi direktori Uilyam Berns va Qatar bosh vaziri Muhammad bin Abdulrahmon Ol Tani Polshada HAMAS vakillari bilan muzokaralar o‘tkazmoqda, deb xabar berdi bir qancha OAV. Isroil rasmiylariga ko‘ra, kamida 109 kishi, shuningdek, bir necha garovga olinganlarning jasadlari jangchilar qo‘lida qolmoqda.
BMT XK gumanitar rezolyutsiya bo‘yicha ovoz berishni kechiktirdi
Ayni paytda, BMT Xavfsizlik kengashi G‘azo sektoridagi vaziyat bo‘yicha rezolyutsiya loyihasi yuzasidan ovoz berishni yana keyinga qoldirdi. Birlashgan Arab Amirliklari tomonidan taqdim etilgan tashabbus gumanitar yordam yetkazib berishni osonlashtirish uchun mintaqada harbiy harakatlarni to‘xtatishga chaqiriqni o‘z ichiga oladi.
Ovoz berish dastlab 18 dekabr kuni kutilgandi, biroq bir necha bor qoldirildi. Xavfsizlik kengashi ishtirokchilari hujjat matnini muhokama qilmoqda. Ovoz berish 20 dekabr kuni tushdan keyin bo‘lib o‘tishi kutilmoqda.
Isroil-Falastin mojarosi
7 oktyabr kuni ertalab HAMASning harbiy qanoti - «Izzaddin al-Qassam brigadalari» Isroilga qarshi «Al-Aqso to‘foni» operatsiyasi boshlanganini e’lon qildi. G‘azo sektoridan Isroil tomon minglab raketalar otildi, qurolli guruhlar Isroil aholi punktlariga kirdi.
HAMASning bildirishicha, operatsiya bosib olingan Sharqiy Quddusdagi Al-Aqso masjidiga bostirib kirish va isroillik muhojirlarning falastinliklarga nisbatan zo‘ravonligi kuchayib borayotganiga javoban amalga oshirilgan.
Bunga javoban Isroil armiyasi G‘azo sektorida HAMASga qarshi o‘nlab qiruvchi samolyotlardan foydalangan holda «Temir qilichlar» operatsiyasi boshlanganini e’lon qildi.
Isroil-Falastin mojarosi avj olgandan beri 18 mingdan ortiq falastinlik halok bo‘ldi. Isroilda qurbonlar soni 1400 dan oshadi. G‘azoning 2,3 million aholisi Isroilning havodan ommaviy bombardimon qilishi va eksklavning to‘liq blokadasi tufayli oziq-ovqat, suv va dori-darmonlar tanqisligidan aziyat chekmoqda.
1 dekabrgacha davom etgan vaqtinchalik otashkesim doirasida 100 dan ortiq garovga olingan shaxs qo‘yib yuborildi, Isroil 240 ga yaqin falastinlikni qamoqdan ozod qildi. Isroil rasmiylariga ko‘ra, 7 oktyabr kuni asirga olingan yana 138 kishi HAMAS qo‘lida qolmoqda.
