O‘zbekistonda Ilm-fan kuni belgilanadi

Fanlar akademiyasi 1943 yil 4 noyabr kuni tashkil etilgani inobatga olinib, O‘zbekistonda 4 noyabr sanasini “Ilm-fan kuni” sifatida nishonlash taklif etilyapti.

Foto: Shutterstock

O‘zbekiston Respublikasining “Ilm-fan kunini belgilash to‘g‘risida”gi qonuni loyihasi e’lon qilindi.

O‘zbekiston prezidentining 2023 yil 9 sentabrdagi “Fanlar akademiyasi tashkil topganligining 80 yilligiga bag‘ishlangan yubiley tadbirlarini o‘tkazishning tashkiliy chora-tadbirlari to‘g‘risida”gi qarori ijrosini ta’minlash maqsadida Fanlar akademiyasi tomonidan qonun loyihasi ishlab chiqildi.

Loyihada Fanlar akademiyasi 1943 yil 4 noyabr kunida tashkil etilganligini inobatga olgan holda O‘zbekistonda ham 4 noyabr sanasini “Ilm-fan kuni” sifatida nishonlash taklif etiladi.

Mazkur qonun ilm-fan bilan shug‘ullanuvchilarni rag‘batlantirish va mazkur sohaga keng jamoatchilik e’tiborni qaratishga hamda ilm-fan sohasidagi yutuqlarni xalqaro va mahalliy doirada e’tirof etishga xizmat qiladi.

Qonun loyihasida ko‘rsatilgan havolaki normalarni amalga oshirish bo‘yicha qonunosti hujjatlar qabul qilingandan so‘ng davlat budjetidan moliyalashtirish talab etiladi.

#Fanlar akademiyasi #ilm-fan