Bayden AQSh prezidentligiga Kamala Harris nomzodini taklif etdi

U o‘z vitse-prezidentini to‘la qo‘llab-quvvatlashini bildirgan.

Foto: Getty Images

Jo Bayden prezidentlik poygasidan chiqqanini e’lon qilishi ortidan AQSh vitse-prezidenti Kamala Harrisni prezidentlik lavozimi uchun nomzod sifatida ilgari surishni taklif qildi.

«2020 yilda [Demokratik] partiya nomzodi sifatidagi ilk qarorim Kamala Harrisni vitse-prezident sifatida tanlash bo‘lgandi. Bu mening eng yaxshi qarorim edi», — degan Bayden.

U Harrisni to‘la qo‘llab-quvvatlashini bildirgan. «Demokratlar, birlashish va Trampni yengish vaqti keldi. Kelinglar, shunday qilamiz», — deya qo‘shimcha qilgan Bayden.

Jo Bayden Demokratik partiyaning ko‘plab yetakchilari va tarafdorlari bosimi ostida 2024 yil noyabrida o‘tkaziladigan AQSh prezidentligi uchun saylovda nomzod sifatida qatnashmaslikka qaror qildi. Iyun oyi oxirida u Respublikachilar partiyasi nomzodi Donald Tramp bilan kechgan debatda o‘ta muvaffaqiyatsiz ishtirok etgandi. 17 iyul kuni esa Bayden koronavirusga chalingani ma’lum bo‘ldi.
Bayden prezidentlikka saylov poygasidan chiqishini e’lon qilgach, Tramp uni tarixdagi eng yomon prezident deb atadi. U shuningdek o‘zi uchun Kamala Harrisni yengish Baydenni yengishdan ko‘ra osonroq bo‘lishini aytgan.

#Jo Bayden #Kamala Harris