Saida Mirziyoyeva Qoraqalpog‘istonga bordi

O‘zbekiston prezidenti yordamchisi Saida Mirziyoyeva Qoraqalpog‘iston Respublikasiga tashrif buyurdi.

Prezident yordamchisining ma’lum qilishicha, safar davomida iqtisodiy-ijtimoiy holati og‘ir tumanlarga borildi va joylardagi ahvol o‘rganildi.

“Ushbu hududlarda yashayotgan aholi hayotini yaxshilash, ular uchun munosib sharoit yaratish borasida qilinadigan ishlar hali ko‘p”, deydi Saida Mirziyoyeva.

Ma’lumot uchun, avgust oyi o‘rtalarida prezident boshchiligida Qoraqalpog‘istonni ijtimoiy-iqtisodiy rivojlantirish yuzasidan yig‘ilish o‘tkazildi.

Unda Qoraqalpog‘istonning imkoniyatlarini to‘liq ishga solish maqsadida hududni rivojlantirish bo‘yicha berilgan topshiriqlarning o‘z vaqtida va sifatli ijrosi ustidan nazorat prezident yordamchisi Saida Mirziyoyeva va prezidentning Orolbo‘yi mintaqasini barqaror rivojlantirish masalalari bo‘yicha maslahatchisi Tursinxon Xudayberganov zimmasiga yuklatildi.