Toshkentda shahar bo‘ylab kezib yurgan qoraquloq ushlandi 

Ishonch telefonlari orqali qilingan murojaat asosida Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasining Yakkasaroy tumani inspektorlari tomonidan joyiga chiqib o‘rganilganda notanish hayvon Qizil kitobga kiritilgan 1 dona qoraquloq ekani aniqlangan.

Holat bo‘yicha Toshkent hayvonot bog‘i mutaxassislari bilan hamkorlikda ushbu hayvonni tutish ishlari amalga oshirilib, hayvonot bog‘iga topshirildi.

Qoraquloq Afrika, Yaqin Sharq, Markaziy Osiyo hamda Pokiston va Hindiston shimoli-g‘arbiy qismidagi qurg‘oqchil hududlarda yashaydi. U mustahkam tuzilishi, uzun oyoqlari, kichkina yuzi, uzun quloqlari va uzun tishlari bilan ajralib turadi. Uning yungi ba’zan qizg‘ish yoki sarg‘ish bo‘ladi, qorin bo‘shlig‘ida kichik qizg‘ish dog‘lari bor.