Xalqaro olimpiya qo‘mitasiga ilk bor ayol kishi prezidentlikka saylandi

Kirsti Koventri Xalqaro olimpiya qo‘mitasining (XOQ) yangi prezidenti etib saylandi. Bu haqda tashkilot sayti orqali ma’lum qilindi.

Koventri XOQning Gretsiyada o‘tkazilgan 144-sessiyasida yashirin ovoz berish orqali yetti nafar nomzod ichidan saylangan. U endi sakkiz yil davomida mazkur lavozimda faoliyat yuritadi va 23 iyun kuni vakolatlar topshirilganidan keyin ishga kirishadi.

41 yoshli Koventri zimbabvelik bo‘lib, sobiq suzuvchi. U ikki karra Olimpiada va yetti karra jahon chempioni, bir nechta jahon rekordlarini o‘rnatgan. Zimbabveda Koventri 2018 yildan beri sport vaziri lavozimida ishlab kelayotgan edi. 2013 yildan beri u XOQ a’zosi. Shuningdek, u 2017 yildan 2024 yilga qadar Xalqaro syorfing federatsiyasi vitse-prezidentli lavozimida ham faoliyat yuritgan.

Qo‘mitaning qayd etishicha, Koventri XOQ prezidenti lavozimini egallagan nafaqat birinchi ayol, balki birinchi afrikalikka aylanadi. Uning birinchi o‘yinlari 2026 yilda Milanda va Kortinada bo‘lib o‘tadigan qishki Olimpiada bo‘ladi. Koventri, shuningdek, Rossiyaning o‘yinlarga qo‘yilishi bilan bog‘liq masalalarni hal qilishi kerak. Ammo u saylovlarda taqdim etgan qisqa taqdimotida bu masala bo‘yicha hech narsa demagan.

Kirsti Koventri XOQning 10-prezidentiga aylanadi. Unga qadar mazkur lavozimni 12 yil davomida germaniyalik Tomas Bax egallab keldi. U 2013 yilda lavozimga saylangan, 2021 yilda esa yana to‘rt yil muddatga qayta saylangan edi.