Dunyoda elektromobillar savdosi oshmoqda

2025 yilning dastlabki olti oyida dunyo bo‘yicha elektromobillar savdosi o‘tgan yilning shu davriga nisbatan 28 foizga o‘sdi va 9,1 million donani tashkil etdi. Bu haqda Britaniyaning Rho Motion tadqiqot kompaniyasi ma’lumot berdi.

Qayd etilishicha, iyun oyida elektromobillar savdosi o‘tgan yilning shu davriga nisbatan 24 foizga oshgan va 1,8 million dona avtomobil sotilgan.

Bu borada Xitoy so‘zsiz yetakchilik qilmoqda. Dunyo bo‘yicha sotilgan avtomobillarning 5,5 milliontasi Xitoyga to‘g‘ri keladi.  

Yevropada 2025 yilning yanvar-iyun oylarida elektromobillar savdosi 26 foizga o‘sib, 2 million donani tashkil etgan. 

Shimoliy Amerikada (AQSh, Kanada, Meksika) o‘tgan olti oy davomida savdo 3 foizga pasayib, atigi 900 ming dona elektromobil sotilgan.  

Dunyoning qolgan mamlakatlarida savdo hajmi 40 foizga oshgan va 700 ming dona elektrokar sotilgan.