Vena Rossiyaga qochgan Yan Marsalekni fuqarolikdan mahrum qilishi mumkin

Wirecard moliyaviy kompaniyasining sobiq bosh direktori va Germaniya adliya tizimidan qochgan Yan Marsalek Avstriya fuqaroligidan ayrilishi mumkin. 7 oktyabr, seshanba kuni Venadagi Ichki ishlar vazirligi arizani ko‘rib chiqayotganini ma’lum qildi.

Avstriya idorasining ta’kidlashicha, Marsalekning Avstriya fuqaroligini bekor qilish imkoniyati so‘nggi haftalarda ommaviy axborot vositalarida uning Rossiyada ekani va faoliyatiga oid xabarlardan so‘ng ko‘rib chiqilmoqda. Davlat xavfsizlik va razvedka boshqarmasi (DSN) bilan yaqin hamkorlikda keng qamrovli tergov olib borilmoqda.

Reuters ta’kidlaganidek, Avstriya fuqaroligini bekor qilish, boshqa narsalar qatori, Avstriya manfaatlari yoki obro‘siga zarar yetkazilgan hollarda, masalan, xorijiy davlat nomidan josuslik qilinganida amalga oshirilishi mumkin. Boshqa asoslar qatoriga boshqa davlat harbiy xizmatiga kirish, xorijdagi uyushgan qurolli guruhlar tarkibida jangovar harakatlarda ixtiyoriy ishtirok etish yoki terrorizm bilan bog‘liq jinoyatlar uchun sudlanganlik hukmining qonuniy kuchga kirishi kiradi.

Marsalek Germaniyaning Wirecard to‘lov tizimi 2020 yil yozida bankrot bo‘lgunga qadar direktorlar kengashi a’zosi bo‘lgan. DAX fond birjasida ro‘yxatga olingan kompaniya hisoblaridan 1,9 milliard yevro yo‘qolganidan keyin bankrot bo‘lgan. Marsalek yashiringan va shundan beri uni xalqaro hibsga olish orderi asosida Germaniya huquq-tartibot idoralari qidirmoqda. OAV ma’lumotlariga ko‘ra, u Germaniyadan Rossiyaga qochib ketgan va 2021 yilda Rossiya pasportini olgan.

Marsalekka Buyuk Britaniya va Avstriyada ham josuslik va Rossiya razvedkasi uchun ishlaganlik ayblovi bo‘yicha tergov olib borilmoqda. Britaniya tergovchilariga ko‘ra, Marsalek Moskva va Rossiya Federatsiyasi nomidan surishtiruvchi jurnalistlarni, jumladan Xristo Grozevni kuzatgan bir guruh bolgarlar o‘rtasida vositachi sifatida markaziy rol o‘ynagan. Avstriyalik tergovchilarga ko‘ra, Marsalek «Venadagi razvedka bo‘limining bir qismi bo‘lib, uning imkoniyatlari va salohiyatidan Rossiya razvedka xizmatlari foydalangan».

2025 yil sentabrida The Insider va Der Spiegel jurnallari Marsalekning Moskvada yashayotgani, FSB bilan hamkorlik qilishi va Rossiya tomonidan bosib olingan Ukraina hududlariga muntazam tashrif buyurishi aytilgan surishtiruvni e’lon qildi. Nashrlarning ta’kidlashicha, u dunyodagi eng ko‘p qidirilayotgan jinoyatchilardan biri sifatida Moskva markazi bo‘ylab «deyarli yashirinmay» aylanib yuribdi. Ular Rossiya poytaxtida olingan avstriyalikning fotosuratlarini nashr etdi.