Andijonda tuman hokimi o‘rinbosari 15 ming dollar pora bilan ushlandi

U yer ajratish uchun pul talab qilgani ta’kidlanmoqda.

Andijonda yer ajratish uchun pul talab qilgan tuman hokimi o‘rinbosari qo‘lga olindi. Bu haqda Ichki ishlar vazirligi xabar berdi, ammo qaysi tuman ekaniga aniqlik kiritilmadi.

Qayd qilinishicha, ushbu shaxs tuman hududidan o‘tgan katta yo‘l bo‘yidagi 400 metr uzunlikdagi suv yo‘lini yopiq tizimga o‘tkazgan holda, yuzaga keladigan 60 sotix maydonda 8 ta savdo do‘koni qurish uchun yer ajratish va tegishli hujjatlarni yuqori lavozimlarda ishlovchi tanishlari orqali rasmiylashtirib berishini aytib, fuqarodan 15 ming dollar talab qilgan.

Mansabdor kelishilgan pulni olayotgan vaqtida ashyoviy dalillar bilan ushlangan.

Unga nisbatan Jinoyat kodeksining tegishli moddalari bilan ish ochilib, qamoqqa olish tarzida ehtiyot chorasi qo‘llangan.