O‘zbekistonning JCh-2026 guruh bosqichidagi raqiblari ma’lum bo‘ldi

AQSh poytaxti Vashingtonda 5 dekabr kuni futbol bo‘yicha 2026 yilgi jahon chempionati guruh bosqichiga qur’a tashlandi.

Qur’a natijalariga ko‘ra, O‘zbekiston milliy jamoasi K guruhidan joy oldi, unga Portugaliya, Kolumbiya va saralashdagi yana bir jamoa (Kongo DR/Yamayka/Yangi Kaledoniya) raqiblik qiladi.

O‘zbekiston 17 iyun kuni Kolumbiyaga, 23 iyun kuni Portugaliyaga, 27 iyun kuni saralashdan o‘tgan jamoaga (Kongo DR/Yamayka/Yangi Kaledoniya) qarshi o‘ynaydi.

O‘yinlarning o‘tkazilish joyi bilan vaqti 6 dekabr kuni e’lon qilinadi.

Qur’a tashlash marosimida O‘zbekiston milliy jamoasi bosh murabbiyi Fabio Kannavaro va o‘zbek futboli afsonasi Mirjalol Qosimov ham ishtirok etdi.

2026 yilgi jahon chempionati AQSh, Kanada va Meksika maydonlarida o‘tkaziladi. Bu safargi turnirda ilk bor 48 jamoa ishtirok etadi. Guruhlardan oldingidek faqat 1- va 2-o‘rin egalari emas, uchinchi o‘rin egalari orasidan nisbatan eng yaxshi ko‘rsatkichlarga ega sakkiz jamoa ham pley-offga yo‘l oladi, pley-off bosqichi oldingidek 1/8 finaldan emas, 1/16 finaldan start oladi. Butun turnir 39 kunga (11 iyundan 19 iyulgacha) cho‘ziladi.

Hali turnir ishtirokchilari ro‘yxati to‘liq shakllanmagan, JCh-2026 yo‘llanmasini faqat 42 jamoa hal qilgan. Yana olti jamoa nomi 2026 yil martidagi o‘tish o‘yinlari orqali ma’lum bo‘ladi.