Sebzorda avariyaviy holat sabab Nexia-3 ustunga borib urildi

9 dekabr kuni Toshkent shahar Olmazor tumanida avariyaviy holat tufayli Nexia-3 rusumli avtomashina ustunga borib urildi. Hodisa natijasida haydovchiga shifokorlar tomonidan birinchi tibbiy yordam ko‘rsatildi.

Foto: Ijtimoiy tarmoqlar

Toshkent shahar IIBB YHXB ma’lumotiga ko‘ra, joriy yil 9 dekabr kuni soat 09:00 larda Olmazor tumani Sebzor ko‘chasida Tracker-2 rusumli avtomashina haydovchisi Nexia-3 avtomashinasiga nisbatan avariyaviy xavfli holat yuzaga keltirgan.

Natijada Nexia-3 rulini boshqarish imkoniyatini yo‘qotgan haydovchi yo‘l chetidagi yoritgichlar uchun mo‘ljallangan ustunga borib urilgan va yo‘l-transport hodisasi sodir bo‘lgan.

YTH oqibatida Nexia-3 haydovchisiga shifokorlar tomonidan birinchi tibbiy yordam ko‘rsatilgan.

Mazkur holat yuzasidan Toshkent shahar IIBB YHXB mas’ul xodimlari tomonidan surishtiruv ishlari olib borilmoqda.

Huquqni muhofaza qiluvchi organlar barcha yo‘l harakati qatnashchilaridan qoidalarga qat’iy rioya qilish, ayniqsa, zich harakat va tor ko‘chalarda ehtiyotkorlikni yanada oshirishni so‘ragan.