BMT Bosh Assambleyasi Ukrainadagi RF harakatlari haqidagi rezolyutsiyani yangiladi

BMT Bosh Assambleyasi 18 dekabr, payshanba kuni Rossiya tomonidan egallab olingan Ukraina hududlarida, jumladan Qrim va Sevastopolda inson huquqlari vaziyatiga oid yangilangan rezolyutsiyani qabul qildi. “Ukrinform” agentligi xabar berishicha, hujjatni xalqaro tashkilotning 79 ta a’zo davlati qo‘llab-quvvatlagan, 16 tasi qarshi ovoz bergan, yana 73 ta davlat betaraf qolgan. Ushbu rezolyutsiyaga qarshi chiqqanlar qatorida, xususan, Rossiya, Belarus, Xitoy, Eron, Shimoliy Koreya, Kuba, Nikaragua, shuningdek Afrikadagi bir qator davlatlar bor.

Rezolyutsiyada RFning Ukrainaga qarshi tajovuzkor urushi aniq qoralanadi, Ukrainaning xalqaro miqyosda tan olingan chegaralari doirasida suvereniteti va hududiy yaxlitligi tasdiqlanadi, shuningdek Ukraina hududlarining maqomini o‘zgartirishga qaratilgan har qanday urinishlar tan olinmasligi qayd etiladi. Bosh Assambleya Rossiyadan agressiyani darhol to‘xtatishni va Ukraina hududidan barcha qo‘shinlarini olib chiqishni talab qildi.

Hujjat Rossiya tomonidan bosib olingan Ukraina hududlarining barchasida inson huquqlari vaziyatini qamrab oladi va Rossiya okkupatsion ma’muriyatlari tomonidan sodir etilayotgan tizimli qoidabuzarliklarni xalqaro monitoring qilishni kuchaytirishni nazarda tutadi. Unda, jumladan, bosib olingan hududlarni militarizatsiya qilish, u yerdagi aholini RF Qurolli kuchlariga majburan safarbar etish, jurnalistlar, huquq himoyachilari va fuqarolik jamiyati vakillarini ta’qib qilish, shuningdek madaniy merosni vayron qilish, xususan Qrimdagi holat yuzasidan jiddiy xavotir bildiriladi.

Yangilangan rezolyutsiyada, shuningdek, ukrain harbiy asirlari va noqonuniy ushlab turilgan fuqarolarga nisbatan qiynoqlar, g‘ayriinsoniy muomala hamda inson huquqlarining boshqa dahshatli ravishda buzilishini bevosita qoralovchi qoidalar ham mavjud. Hujjat BMTning Mustaqil xalqaro komissiyasi xulosalariga tayanadi: ular bosib olingan hududlarda ham, Rossiyaning o‘zida ham majburiy yo‘qolib qolishlar va qiynoqlar faktlarini tasdiqlaydi. Bundan tashqari, hujjatda RFning o‘g‘irlab ketilgan va asirga olingan ukrainlarning taqdiri haqida ma’lumot berishdan bosh tortayotgani ham qoralanadi.

Ukraina tashqi ishlar vaziri Andrey Sibixa BMT Bosh Assambleyasi tomonidan rezolyutsiya qabul qilinganini olqishladi. “Ukraina 2016 yildan beri har yili ushbu rezolyutsiya qabul qilinishiga tashabbus ko‘rsatib keladi. Hujjat Rossiya agressiyasini qat’iy qoralaydi, Ukrainaning suvereniteti va hududiy yaxlitligini tasdiqlaydi hamda urushni darhol to‘xtatish va Rossiya qo‘shinlarini olib chiqishni talab qiladi”, — deb yozdi Sibixa X ijtimoiy tarmog‘ida.

“Rezolyutsiya inson huquqlari va gumanitar huquqning jiddiy buzilishlari bo‘yicha xalqaro monitoringni kuchaytiradi va javobgarlikka tortish zarurligini ta’kidlaydi”, — deya qo‘shimcha qildi vazir va 79 ta davlatga prinsipial qo‘llab-quvvatlagani uchun minnatdorchilik bildirdi.