“Islohotlarni amaliy natijaga aylantirishni o‘rgandik” - Prezident

Prezidentning so‘zlariga ko‘ra, so‘nggi to‘qqiz yilda mamlakat katta taraqqiyot yo‘lini bosib o‘tdi: iqtisodiyot qayta shakllandi, bozor munosabatlari rivojlantirildi, ijtimoiy himoya kengaytirildi, qonun ustuvorligi mustahkamlandi.

«So‘nggi to‘qqiz yilda biz sizlar bilan, el-yurtimiz bilan birgalikda katta taraqqiyot yo‘lini bosib o‘tdik. Iqtisodiyotimiz yangidan shakllandi, bozor munosabatlari, ijtimoiy himoyani kengaytirdik, qonun ustuvorligini mustahkamladik. Eng muhimi, islohotlarimiz samarasini har bir mahalla, har bir xonadon va har bir inson kundalik hayotida his qilmoqda. Bir so‘z bilan aytganda, biz islohotlarni aniq amaliy natijaga aylantirishni o‘rgandik», — dedi davlat rahbari.

Shuningdek, prezident islohotlar natijasini shahar va qishloqlarning tobora yangicha qiyofa kasb etishi, zamonaviy korxonalar, savdo-servis maskanlari, maktab, bog‘cha va shifoxonalar, obod ko‘cha va mahallalar, transport-logistika tizimi hamda raqamli xizmatlar misolida ko‘rish mumkinligini qayd etdi.