Kam litrajli avtomobillar uchun bojlar oshdi

O‘zbekistonda dvigatel hajmi 1000 va 1200 sm kubgacha bo‘lgan yengil avtomobillar importi uchun boj imtiyozining amal qilish muddati yakuniga yetdi va stavkalar avvalgi darajaga qaytdi.

Pasaytirilgan stavkalar 2023 yil 17 iyuldan kuchga kirgan va 2026 yil 1 yanvarga qadar ishlab chiqarilganiga 1 yildan oshmagan yangi yengil avtotransport vositalarini olib kirishda bojxona bojlarining quyidagi stavkalari belgilangan edi:

• dvigatel silindrlarining ish hajmi 1 000 sm kubdan oshmaydigan yangi yengil avtotransport vositalari uchun – 0 stavka;
• dvigatel silindrlarining ish hajmi 1 200 sm kubdan oshmaydigan yangi yengil avtotransport vositalari uchun – 5 foiz stavka.

O‘sha vaqtda bu qaror avtomobil bozorida raqobatni rivojlantirish va aholini hamyonbop yengil mashinalar bilan ta’minlashga qaratilgani aytilgan edi.

Imtiyoz muddati uzaytirilmadi va 2026 yil 1 yanvardan quyidagicha stavkalar amal qila boshladi:

• 1000 sm kubgacha – 15 foiz va har bir sm kub uchun 0,4 AQSh dollari;
• 1200 sm kubgacha – 15 foiz va har bir sm kub uchun 0,6 AQSh dollari.