Dunyodagi eng kuchli armiyalar reytingi e’lon qilindi. O‘zbekiston nechanchi o‘rinda?

O‘zbekiston armiyasi harbiy salohiyat bo‘yicha 145 ta davlat orasida 53-o‘rinda qayd etildi. Bu haqda Global Firepower Index’ning yangilangan reytingida keltirib o‘tilgan.

Mutaxassislar qurolli kuchlarni oltmishdan ortiq parametrlar bo‘yicha baholagan. Ularning asosiylari qatorida mudofaaga mablag‘ sarflanishi darajasi, texnik ta’minot, armiya soni, tanklar, kemalar, samolyotlar va boshqa harbiy texnikalarning miqdori, neft mahsulotlari mavjudligi, davlatning geografik xususiyatlari, ishlab chiqarish va ba’zi resurslar iste’moli, logistik imkoniyatlar kabi mezonlar hisobga olingan.

Reytingga ko‘ra, Markaziy Osiyo davlatlari orasida O‘zbekiston armiyasi harbiy salohiyat bo‘yicha birinchi o‘rinni egallagan. Chegaradosh mamlakatlar: Qozog‘iston 58-o‘rin, Turkmaniston 78-o‘rin, Tojikiston 100-o‘rin, Qirg‘iziston 109-o‘rin, Afg‘oniston esa 121-o‘rinda qayd etilgan.

Sobiq SSSR davlatlari orasida O‘zbekiston uchinchi o‘rinni egallab, faqatgina Rossiya (2-o‘rin) va Ukraina (20-o‘rin) armiyalaridan ortda qoldi.

Yangilangan reytingda harbiy salohiyati dunyo bo‘yicha eng yuqori baholangan davlatlar Top-10 taligi quyidagicha:

• AQSh;
• Rossiya;
• Xitoy;
• Hindiston;
• Janubiy Koreya;
• Fransiya;
• Yaponiya;
• Buyuk Britaniya;
• Turkiya;
• Italiya.

Ro‘yxatning eng quyi pog‘onasidan Butan, Beliz, Markaziy Afrika Respublikasi kabi mamlakatlar o‘rin olgan.