12 ta korxonaning ustun muzokara kuchiga egaligi e’tirof etildi

Raqobat qo‘mitasi maishiy chiqindilarni to‘plash va olib chiqib ketish hamda temiryo‘l liniyasini foydalanishga berish xizmatlarini tahlil qildi. O‘zrganishlar natijasida ayrim xo‘jalik yurituvchi sub’yektlar o‘zlariga biriktirilgan hududlarda muzokara jarayonlariga bir tomonlama ta’sir ko‘rsatish imkoniyatiga ega ekani aniqlangan.

Olib borilgan tahlillar asosida “Raqobat to‘g‘risida”gi qonunning 14-moddasiga muvofiq, qo‘mita hududiy organlarining tegishli buyruqlari bilan jami 12 ta korxona ustun muzokara kuchiga ega deb e’tirof etildi.

Xususan, maishiy chiqindilarni to‘plash va olib chiqib ketish xizmatlari bo‘yicha Toshkent viloyatida “Zangiota Obodon”, “Rahnamo Servis” va “Angren Bunyod Fayz” MChJlar, Farg‘ona viloyatida“Maxsus Garant Avto Servis” hamda “Vodiy Maxsus Sanitar Trans” MChJlar, Surxondaryo viloyatida “Surxondaryo viloyati Toza Hudud” DM, “Bio Texno Eko” MChJ, «Bio-Tex-Eko» MChJning Sariosiyo va Uzun filiallari, shuningdek “Qiziriq-Invest” va “Sale Kingdim” MChJlar ustun muzokara kuchiga ega deb topildi.

Temiryo‘l liniyasidan foydalanish xizmatlari bo‘yicha esa Toshkent viloyatida “Petromaruz Uzbekistan MChJ”, Sirdaryo viloyatida “Ulug‘bek Yangiyer Qurilish” MChJ tegishli ro‘yxatga kiritildi.